Kva må til for at ein tannklinikk blir opplevd som tilgjengeleg og brukarvenleg for folk som har psykiske vanskar? Om du var erfaringsmedarbeidar i tannhelsetenesta, kva ville du lagt vekt på om du blei spurt til råds?

Det er på høg tid at brukarstemmer får plass og blir høyrde både i samfunn og helsetenester, og heldigvis skjer det mykje bra på dette området. Som psykolog med deltidsstilling i tannhelsetenesta er eg opptatt av at tilboda ved klinikken skal vera tilgjengelege for alle, men har eit klart inntrykk av at for mange som slit med psykiske vanskar eller lidingar er tannhelse eit sårt tema.

Psykiske vanskar og tannbehandling

Internasjonal forskingslitteratur fortel at folk som har langvarige psykiske lidingar ofte også slit med dårleg tannhelse og store utfordringar når det gjeld å nytta seg av eksisterande tannhelsetenester. Det kan altså sjå ut som det eksisterer eit stort misforhold mellom behandlingsbehov på eine sida og faktisk bruk av tannhelsetenesta på andre sida. Forskarar viser til eit komplekst samspel av faktorar som skapar barrierar og vanskeleggjer tilgang og bruk av tannhelsetenester for denne gruppa. Desse faktorane har mellom anna å gjera med personen sjølv eller lidinga (livsstil, biverknader av medikament, symptombelasting etc.), systemet (brukarfiendtlege tenester) og tenesteutøvar (diskriminering og ulike former for maktmisbruk).

Veit dei om gratistilbodet?

Dette er alvorleg, ikkje minst fordi tannhelse er ein viktig faktor for generell helse, livskvalitet og velvære, og påverkar personens høve til å kunna eta, snakka og vera saman med andre. I Noreg har mange personar med psykiske lidingar tilbod om gratis tannbehandling. Kriteriet er at ein anten er innlagt over tid eller har jamnleg oppfølging av psykisk helseteneste (heimesjukepleie). Me manglar systematisk kunnskap om i kva grad dei dette gjeld er kjent med og gjer seg nytte av retten dei har.

Gjere tilbodet betre

Me treng kunnskap og kompetanse til å skjøna kva barrierar som eksisterer og kva endringar som må til for at behandlingstilboda skal opplevast som reelt tilgjengelege og relevante. I regi av Tannhelsetenesta kompetansesenter Vest/Hordaland ønskjer me å få i gong eit forskingsprosjekt om tannhelse og psykisk helse. Det overordna målet er å framskaffa kunnskap som kan bidra til at tannhelsetenesta betre kan leggja til rette for personar som har psykiske vanskar. Me vil også utforska korleis tannhelsetenesta kan samarbeida med kommunen (psykisk helseteneste) og brukarorganisasjonar for å betra tilboda.

Recovery?

Eg er usikker på om det går an å snakka om recoveryorienterte tannhelsetenester, til det kjenner eg litteraturen for dårleg. Men eg har tru på at me i alle fall kan ha mål om å signalisera haldningar i tråd med recoverytenking. Kva må til for at ein tannklinikk kan omtalast slik?

Tannhelse er også helse

Tannhelse er også helse

Mer om:

Les også: